大湖臺三線老樟樹个悲歌

【文、圖／彭欽清／國立政治大學退休教授】

 

　　吾公、吾爸、吾伯、吾叔、吾姐公同姐婆、吾舅、吾姨這兜總下食焗腦飯。𠊎從細仔就聽大人講樟樹、香樟、臭樟、牛樟、腦寮，腦油、腦砂這兜東西，故所𠊎對樟樹盡有感情。

　　民國八十四年台三線苗栗大湖段拓寬該央時，公家講愛同水尾坪到下街有兩百一十七頭个老樟樹倒淨淨。苗栗一個記者林錫霞打電話分𠊎，拜託𠊎轉來參加護樹運動，請𠊎在公聽會過地方電視臺个節目肚來同大湖个鄉親溝通。

（舊臺三線未遭殃的老樟樹）

　　該下个總統係李登輝，省主席宋楚瑜，縣長何智輝，鄉長黃碧忠，公家當有錢，捼起錢來當慨，有建設就好，管佢恁多麼个歷史文化。一隻命令下來，就愛同這兜樹仔斬斬忒。

　　有去種過這兜老樟樹个老一輩个人講：種該下還係日本時代，有五、六十年欸。正種落去个樟樹愛服侍到像阿公樣仔，一儕負責幾下頭，該淋水就愛淋，愛緊去巡等，係無生，會罰。這下無想著講愛倒就愛倒，實在就當毋盼得。

　　這兩百零頭樟樹勻大勻大，看起來盡靚，坐車仔對苗栗入來，看著這兜樹仔，就知會到大湖街誒。

　　贊成同反對倒樟樹个雙方坐下來參詳，公家、種草莓過做生理个鄉親贊成較多，反對个大體就係對老樟樹有感情、對文化較有理想个人。

　　公聽會該下，種草莓个鄉親講，樹仔會蔭著草莓，又會藏鳥仔食草莓。𠊎講觀光客看著老樹个景緻恁靚，會頓腳下來尞，順嗄仔買草莓，就補得轉來誒。 　　

　　這兜鄉親大體就係隔壁鄰舍親戚朋友，講話還較爭，有兜毋熟事个講話就已難聽，有一儕竟然講：你歇在台北，管恁多漦事！聽到𠊎火砰著，應講：斬就斬，將來就起一個樹魂碑，同愛斬樹仔个人个名仔列列上去，等樹魂正去尋佢這兜輸贏。公聽會个主持人聽著雙方个火氣緊擎緊高，煞煞講先尞十分鐘，大家降下仔火。　

　　背尾反對這片提出一個替代方案：法雲寺到芎蕉坑口該析个產業道路開闊來，同現下个路就變到單行道，入个行現下个路，出个行新个路。公家講恁樣會拖著工程，做毋得。想到無法，護樹个鄉親就要求樹仔莫倒，先徙去哪位暫種。

　　結果毋使講乜知，工人六月仔挖樹仔斷根，放在路脣歸半隻月仔正徙去苗栗市个苗圃。這擺護樹運動出錢出力盡多个阿粉姊（謝粉玉女士）三不五時會去探啊，佢講盡尾有生个正兩十頭仔，兼兼仔會兩百頭个老樟樹就恁仔來消淨淨。

　　係講這兜老樟樹無去停動佢，這下對雪霸公園汶水遊客中心該位騎自行車到大湖，做得在路脣兩百零頭百年老樟樹下騎啊過，怕會盡暢快正著。

（舊臺三線未遭殃的老樟樹）

　　
（四縣腔）彭欽清教授 聲檔 — 大湖臺三線老樟樹个悲歌





　

▲BACK